B’at neurones chi cunfigurant su chi li narant su GPS internu de su cherbeddu. S’agatant in s’ipocampu, sa regione tzerebrale responsàbile de sa memòria.
S’imbènnida de su GPS tzerebrale est istada fundamentale pro cumprèndere comente su cherbeddu s’ orientat in s’ispàtziu. Pro nàrrere, in s’interi chi faghimus una passigiada in su parcu, s’atividade de sos neurones permitit de rapresentare su percursu in sa mente. Custa atividade neuronale cunsistit in s’emissione de sinnales elètricos curtzos meda. Manu manu, custos sinnales s’alluent e si nch’istudant cunforma a sa secuèntzia de sos logos visitados, formende una cadena de informatzione. Sos neurones chi s’ativant tirant a afortire sas connessiones issoro, e duncas abbarrant vinculados. Cando si torrat a colare in su matessi caminu s’ativat sa matessi secuèntzia; si si colat in un’incurtziadòrgiu, sas secuèntzias chi representant caminos ischirriados abarrant unidas, formende una mapa mentale.
Ma comente si format custa mapa? Una de sas ipòtesis est chi sos datos s’organizant in retzas in ue sas rias rapresentant cada unu de sos neurones e sas colunnas su tempus; in custa manera, cada intrada in sa retza currispondet a su valore chi leat s’atividade de unu neurone cuncretu in unu mamentu determinadu de su tempus. Pro nàrrere, si si registrat s’atividade de 100 neurones in sos 1.000 segundos de sa passigiada in su parcu, si gènerat una retza de 100 rias y 1.000 colunnas.
