Un'emendamentu in cherta de evitare ballotàgios

Un'emendamentu in cherta de evitare ballotàgios

Si amus comintzadu custa chida faeddende de inelegibilidade presidentziale frantzesa, como la serramus contende sa punna de chie, pro sas amministrativas italianas, non diat chèrrere su ballotàgiu si unu candidadu a sìndigu at otènnidu nessi su 40% de sas preferèntzias in sas tzitades cun prus de 15mìgia cristianos. Rewind: sa lege atuale faeddat de majoria assoluta su primu giru, est a nàrrere 50% prus unu. Sa proposta, un’idea chi no est noa, tenet comente suportu un’emendamentu a su decretu lege chi nde sunt faeddende in sa commissione Afàrios costitutzionales de su Senadu. E duncas diat dèvere interessare sa torrada eletorale de su 25 e de su 26 de maju. Ma s’artìculu 72 de sa Costitutzione nos agiudat a cumprèndere chi sa cosa, de custa manera, no est possìbile: «Sa protzedura normale – leghimus – de esame e de aprovatzione direta dae parte de sa Càmera est semper adotada pro sos disegnos de lege in matèria […] eletorale […]». Duncas bi cheret sa protzedura normale, est a nàrrere unu disegnu de lege e no un’emendamentu che a custu. B’aiant giai proadu tres senadores leghistas s’annu coladu emendende unu decretu lege in contu eletziones europeas, de sas de su Piemonte e de sas de 3.700 Comunes. S’arrennegu de Mattarella determineit su retiru de s’emendamentu. Como bi semus torra. Semper dae manu dereta. S’idea est de si garantire sa vitòria a su primu turnu timende ribaltones a su segundu. Est craru chi una medida che a custa interessat chie pensat de èssere prus forte a su primu turnu. De prus: prevìdidu finamentas unu prèmiu de majoria cun su 60% de sos sègios a sa lista o a su grupu de listas collegadas a su candidadu chi binchet. Est una proposta chi no at andare a logu, gasi si narat. Ma unu cunsideru cheret fatu: non sunt gasi abbassende sos cuorum mìnimos.

mauro piredda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *