Posca de àere bìvidu s’infodemia pro sa pandemia, como semus bivende sa de sa gherra. S’infodemia càpitat cando sa cantidade de noas chi si subraponent una a s’àtera est gasi manna chi si fràigat una nue de informatziones e opiniones chi nos istontonat sena faghe·nos cumprèndere prus nudda.
Chie intrat como in sas retzas sotziales s’abbìgiat deretu chi non si faeddat de àteru e, sa matessi cosa, càpitat alluende sa televisione: gherra in totue. Est fàtzile a si sapire chi totus ant de nàrrere cale si siat cosa pro non s’intèndere a fora de custa traschia e, forsis, isperende de la pòdere controllare. Un’unda manna de paràulas chi pro su prus serbit a pagu e chi nos partzit in grupos de tifosos. Sos meses imbenientes ant a èssere economicamente e psicologicamente difìtziles meda, mescamente ca benint a pustis de duos annos de pandemia e cun sa gente chi at sos nèrvios a bìculos. Tando proamus a nos firmare e meledare: ca custa mobilitatzione de concas, a dolu mannu, nos at a serbire pro àteru.
(redatzione)
Leave a comment