Sa tertza bìnchida pro sa Dìnamo Tàtari est bènnida eris in domo de s’iscuadra sarda. No fiat una partida comente sas àteras ca s’aversàriu fiat Tràpani, sa conca de sa classìfica. Mancari cussu, sos tataresos ant tancadu cun dòighi puntos in prus, sighende sa cursa a sa sarvesa. Su chi at detzisu su resurtu finale sunt istados sos tiros dae tres e mescamente sas faddinas medas de sos sitzilianos, cun pertzentuales bàscias in sos tiros lìberos e dae a tesu.
Sos sinnales chi carchi cosa fiat mudada in sa conca de sos de Bulleri, est essida a campu in sa partida de su 9 de martzu contra a Venètzia pèrdida petzi pro unu puntu, cun unu tzentru de sos terramannesos in sos ùrtimos tres segundos chi at furriadu sa situatzione de vantàgiu de s’iscuadra de domo. Una partida chi est istada in echilìbriu pro tempus meda e cun sa Dìnamo a dae in antis in prus de unu momentu.
Ma sunt sas duas bìnchidas a pustis chi ant acraridu chi sa Dìnamo est torrada a una cunditzione prus dèghile. Disafios contra a iscuadras impinnadas in sa matessi batalla sua, cun pagos o prus puntos de issa. Sa prima est istada Treviso e a pustis Cremona bìnchidas pro tres e duos possessos de bòcia in prus. Su de importu però est istada sa gana de lutare e sa capatzidade de gestire su vantàgiu chi ant mustradu. Contra a Trevisu, mescamente, ca fiat una trasferta in ue sos vènetos ant inghitzadu cun un’atza chi at assuconadu sos sardos, chi però ant mantesu su sàmbene fritu, sunt colados a dae in antis e no ant mai lassadu su vantàgiu, cun su repartu de sos italianos, chi at realizadu puntos importantes. Unu match prus difìtzile cun Cremona chi at ghiadu fintzas a s’agabbu de su tertzu cuartu, ma chi no est renèssida a abarrare a dae in antis in su momentu prus dìligu de sa partida. Cando sa Dìnamo est colada subra at gestidu cun fritesa su puntègiu sena si leare arriscos medas.
Sa de eris tando est una bìnchida chi ponet isperas pro s’agabbu de s’istajone. Un’ischidada a tardu però pro punnare a àteru chi no siat sa sarvesa, cun oto puntos dae sos playoff e ses partidas de giogare ebbia.
Gabriele Tanda
Leave a comment