A prevìdere su perìgulu de sas rutas in sos chi tenent su Parkinson e s’evolutzioine de sa maladia est una de sas punnas de sos istùdios chi sunt faghende in totu su mundu. Mescamente in sos ùrtimos chimbe annos s’esplosione de sos modellos de imparòngiu automàticu e de sos ssensores indossàbiles ant permissu de collire unu muntone de datos subra de sa variabilidade de sa postura e de sa caminada, chi pustis los ant impitados pro bogare a campu algoritmos preditivos.
In custu cuntestu, unu grupu multidisciplinare de espertos at isvilupadu un’algoritmu chi est a tretu de prevìdere su perìgulu de rutas e sas flutuatziones motòrias (sas chi lis narant movimentos “on – off”) tìpicas de su Parkinson. Coordinadu dae s’Azienda provintziale pro sos servìtzios sanitàrios de Trentu (APSS), su progettu at tentu s’agiudu de sa Fundatzione Bruno Kessler (FBK), de s’IRCCS Ospidale Policlìnicu Santu Martine e de s’Universidade de Gènova.
Su Parkinson est sa segunda maladia neurodegenerativa in tèrmines de frecuèntzia in totu su mundu a pustis de s’Alzheimer; si pensat chi sos casos siant destinados a addopiare intro de su 2030, pro more de su fatu chi sa populatzione est imbetzende semper de prus. Sas rutas sunt unu problema comunu pro sos malàdios, cun cunseguèntzias chi includent lesiones, ricòveros in ospidale e minimòngiu de sa mobilidde, de sa calidade de sa vida e de s’isetu de vida. Paret chi a su 60% de totu sos malàidos l’at acuntèssidu de rùere nessi una borta. E chie ruet referit de una timòria prus manna de rùere, de sa cumpromissione de s’echilìbriu e de flutuatziones motòrias prus frecuentes a cunfrontu de sos fedales issoro chi ruent prus pagu.
Movende dae sa digitalizatzione, armonizatzione e organizatzione de sos datos de sos malàidos de Parkinson ricoverados in sos tzentros clìnicos interessados, sos istudiosos ant istruturadu sistemas de datos istandardizados ispetzìficos pro sa maladia e ant semodadu modellos de variàbiles clìnicas e neuropsicològicas fundados in s’intelligèntzia artifitziale, fundamentales pro sa previsione de sas trajetòrias possìbiles de sa patologia.
