Sa Sardigna in sa sigunda gherra mundiale no est istada su tzentru de atziones medas, pro fortuna, ma carchi batalla b’est istada. S’ischiat chi in una de custas fiat rutu in su mare a dae in antis de Casteddu sardu un’aèreu americanu, ma fintzas a eris si fiat chirchende in sos giassos faddidos, ma gràtzias a Inarmando Cimino, unu piscadore, s’est iscobertu cussu giustu. Difatis, onni borta chi isse betaiat sas retzas in unu tretu de mare perdiat sos trastes ca si blocaiant in su fundu. Gasi at mutidu sa Lega Navale de Casteddu sardu chi l’at acumpangiadu in su logu, si sunt acabussados pro chircare sa resone de su problema e si sunt agatados in dae in antis su carasu de unu Grumman TBF Avenger betzu e mesu isciusciadu, ma galu intreu. Custa genia de aèreu aiat tres ghiadores: unu fiat su pilota, unu su navigadore e su de tres fiat su radiotelegrafista. Un’àteru piessignu fiant sas alas chi si podiant pinnigare. S’idea de sa Lega Navale de Casteddu sardu est cussa de innetare sas ruinas e sigomente sa profundidade no est gasi manna, su progetu benidore est de abèrrere su giassu a sas bìsitas de sos turistas.
(redatzione)
Leave a comment