Sos Carabineris de su Cumandu provintziale de Nùgoro sunt indaghende pro iscobèrrere chie eris, a ora de sas 8 e mesu de sero, at postu una bomba in su muru de su depuradore comunale de Torpè, acumpangiada dae una iscrita de minetza contra a su depòsitu de su gas chi diat dèpere fraigare sa sotziedade Medea in pessu fora de sa bidda, in localidade Istrumpadòglios.
In sas dies coladas sa Giunta comunale, su sìndigu Martino Sanna, su Consìgiu e unu comitadu de tzitadinos ant espressadu sa contrariedade issoro a s’istrutura, cussiderada tropu a curtzu a sas domos e duncas pagu segura. Su sìndigu at cundennadu custu atu de minetza, narende chi sa violèntzia no est manera giusta pro isòrvere sos problemas e non si depet praticare in tames de unu cunfrontu democràticu e tzivile. Sanna pedit a sos tzitadinos de Torpè de abarrare unidos e de cundennare chie at fatu custa atzione vile chi faghet dannu a sa bidda intrea.
Mariantonietta Piga