Mèrcuris 30 de abrile sos Istados Unidos de Amèrica e s’Ucràina ant firmadu in Washington un’acordu cummertziale chi garantit a sos americanos s’isfrutamentu de sas terras raras ucràinas.
Su Ministru de s’Economia de su paisu europeu Yulia Svyrydenko at iscritu in X ca pro contu de su guvernu de s’Ucràina at firmadu «s’acordu pro istabilire unu Fundu de investimentu intre Istados Unidos e Ucràina pro torrare a fraigare su paisu. Paris cun sos Istados Unidos, semus creende su fundu chi at a atirare investimentos globales a su paisu nostru».
Pro sos americanos at firmadu su Segretàriu de su Tesoro Scott Bessent chi at decraradu ca s’amministratzione Trump est impignada in unu «protzessu de paghe pro un’Ucràina lìbera soberana e pròspera». At agiuntu ca nemos de sos chi ant agiuadu «sa màchina de gherra russa at a tènnere profetu in sa ricostrutzione de s’Ucràina».
A pustis de sas tensiones de sos ùrtimos tempos intre sos capos de istadu de sas duas natziones duncas, est arribadu custu acordu. Allumìniu, grafite, petròliu e gas naturale, terras raras e s’estratzione issoro sunt a sa base de custu patu econòmicu.
Segundu su documentu firmadu, in sas paràulas de Svyrydenko, sa propiedade de sas risorsas naturale abarrat a s’Ucràina e su fundu est a su 50% intre sos duos istados.
In prus s’acordu non diat dèpere rapresentare un’intopu a s’integratzione de su paisu islavu in s’Unione Europea. Sos Istados Unidos ant a dare unu cuntributu econòmicu a su fundu e in prus ant a pòdere dare un’agiudu militare, comente sistemas de difesa aèrea.
S’acordu, narat semper su ministru, at a durare dècadas.
S’Ucràina duncas, a pustis de annos de gherra cun sa Rùssia e de àere pèrdidu, de facto, totu s’ala orientale de sos territòrios suos, tzedet, semper de facto, sas richesas suas a su chi fiat s’alleadu printzipale chi però, comente a fatu a cumprèndere bene su presidente Trump, como cheret a ddi torrare nessi una parte de su dinari ispèndidu pro sos armamentos mandados a Kiev.
S’acordu, presentadu comente un’èsitu mannu dae sa diplomatzia ucràina, paret prus a prestu sa bèndida de un’istadu chi arriscat de èssere possedimentu coloniale de sos Istados Unidos.
(gianni muroni)
Leave a comment