Foto leada dae su profilu X de Basel Adra
Sa note de su 24 de martzu unu de sos registas binchidores de su prèmiu Oscar pro su documentàriu No other land , est istadu arrestadu.
Hamdad Ballal fiat in sa bidda palestinesa de Susya, in ue est nàschidu e in ue bivet, parte su guvernatoradu de Hebron, in sa parte meridionale de sa Tzisgiordània, cando sos residentes sunt istados atacados dae colonos israelianos.
Ballal etotu est istadu vìtima de s’agressione e paris cun issu militantes filopalestinesos de Istados Unidos.
A coa at mutidu un’ambulàntzia ma mentras ddu fiant meighende est lòmpidu s’esèrtzitu chi nche dd’at leadu a presone, in s’istatzione de politzia de Kiryat Arba.
In ie, at contadu Ballal, sos sordados dd’ant iscutu e, a pustis de èssere abarradu totu sa note cun una fasca in sos ogros e sas manos acapiadas, a sa fine dd’ant liberadu.
Unu de sos àteros registas de No other land, s’israelianu Yuval Abraham, at denuntziadu, in unu messàgiu in X, (ex Twitter), sa mancàntzia de solidariedade de cudda matessi AMPAS (Academy of Motion Picture Arts and Sciences) chi pagu chidas a como ddos at premiados cun s’istatuedda indorada.
Mentras calicunu de sos cumponentes de s’Academy americana, massimamente in su setore documentarìsticu, si cheriat ischierare in favore de su documentarista arrestadu, at sighidu Abraham, s’istitutzione, nessi finas a como, no at chertu leare una positzione pùblica de cundenna pro sas violèntzias chi Hamdan Ballal at subidu.
Aterunu de sos registas de su filmi chi at documentadu s’ocupatzione de sa Tzisgiordània, Basel Adra, at decraradu ca su motivu de custu cumportamentu de s’Academy americana est ca Hamdan est palestinesu. «Aterunu signale chi sas vidas nostras non contant», at agiuntu.
Su fatu est sa cunfirma chi sa situatzione in Terra Santa sighit a èssere esplosiva finas in sa parte otzidentale de sos territòrios palestinesos.
(gianni muroni)
Leave a comment