In una de sas duas reuniones prus de importu de sa Repùblica Populare tzinesa, sa ghia de su Partidu Comunista Tzinesu at acusadu sos Istados Aunidos de firmare sa crèschida de s’economia de su Paisu e de àere s’istrategia de partzire sos mercados europeos dae s’indùstria tzinesa. Su ministru de s’internu tzinesu puru at incurpadu sos americanos de impreare sa gherra russa contra a s’Ucràina pro fàghere dannu a sa potèntzia orientale. Ambas duas sas parlatas sunt istadas bortadas in inglesu, ma non sunt istadas publicadas a intro de s’imprenta de su Paisu.
Su guvernu tzinesu est in dificultade cun sa gestione de sa pandemia de Covid, chi in Tzina est galu bia e est arressende setore maicantos de s’economia. Sos contàgios sunt meda e sa sanidade est in trìulu. Sa libertade de mòvida, recuperada a pustis de manifestatziones, no est apasighende su male istare de sa populatzione. Sos datos econòmicos sunt andende male mescamente pro custu, ma reconnòschere una faddina, pro una ditadura, no est gasi fàtzile.
Sa tensione intre sas duas potèntzias sunt in un’anda e torra chi ammustra sos istorbos chi est bajulende su Paisu asiàticu. Prima sos nèrvios pro Taiwan, posca sos acordos de cummèrtziu cun Washington, a pustis sa cuntierra pro sas botzas iscobiadoras agabbada cun nudda, como cust’atacu. Paret chi sa Tzina siat in una duda de importu pro su mundu intreu: cunfrontu tèteru contra a sos USA sighende Putin o, a s’imbesse, abertura econòmica a s’Otzidente chi fintzas a como l’at dadu crèschida e istabilidade?
(redatzione)
Leave a comment