Sàbadu sos aèreos americanos ant betadu a terra, serente a sa costa de su South Carolina, una botza iscobiadora tzinesa de sessanta metros de mannària. A pustis de carchi die ant recuperadu totu su materiale, chi fiat mannu meda, e l’ant analizadu pro cumprèndere ite fiat. Sa Tzina, difatis, aiat decraradu chi s’aparèchiu fiat petzi unu traste pro istudiare su clima.
Oe sunt essidos a campu sos resurtos de sos esàmenes de sa seguresa americana: sa botza serbiat pro annotare sa base militare de Malmstrom, in sos USA, chi costoit mìssiles nucleares e chi sa meteorologia non b’intrat. Sos americanos si sunt abigiados fintzas chi su traste non fiat su primu chi colaiat a subra de sos Istados Aunidos, ma nessi su de bator, e chi sa botza est unu cantu de unu programma prus ampru chi pertocat baranta Paisos de su mundu. Sos tzinesos ant annotadu Ìndia, Giapone, Taiwan e s’Europa e pro custa resone sos USA ant assoddidos un’addòbiu pro faeddare de custa situatzione.
Ma b’at galu sa netzessidade de botzas iscobiadoras in su 2023? Cando unu satèllite est in subra de unu logu, sos àteros Istados, si nde sapint. De sa botza nono e in prus podet fuire dae sa mirada de sos radar, istare prus a curtzu a sos obietivos e acrarire su chi aiant bistu sos satèllites e retzire messàgios e fiotos de datos.
Ma semus seguros chi non fiat unu traste iscientìficu? Sas botzas metereològicas connotas dae sa comunidade iscientìfica, non tenent unu motore nen unu timone, no ant bisòngiu de pannellos solares pro fàghere biàgios gasi longos. Sos trastes iscientìficos sighint sos bentos, custu fiat ghiadu dae a tesu subra de obietivos de importu.
(redatzione)
Leave a comment