Turchia, muru artziadu a làcana cun s’Iran

Acumpridu gioja su fràigu de unu muru in unu tretu postu a làcana intre sa Turchia e s’Iran. Sa longària sua est de 81 chilòmetros e ‘annùntziu l’at dadu su ministru de sos Afàrios internos Suleyman Soylu, via twitter. Su muru, in sa provìntzia orientale de Agri est cunfinante cun su nord ovest iranianu e covecat su 15% de sa làcana intrea intre sos duos paisos (chi nche bàrigat sos 500 chilòmetros). Tzimentu, filuferru ispinadu e sistema de bardiamentu eletrònicu sunt sos elementos de custa istrutura murària chi contat duos annos de traballu. Sa resone de custu muru? Sa de cuntrastare «sas minetzas de organizatzione terrorstica», at naradu Soylu, inditende pro seguru a su Pkk e a grupos afiliados. Unu muru che a custu nche l’aiant giai artziadu in parte manna de sa làcana turco-siriana. Semper gioja Soylu s’est oviadu in videocunferèntzia cun sa ministra italiana Luciana Lamorgese pro faeddare de sa collaboratzione bilaterale pro su cuntrastu a su tràfigu de migrantes e de droga e pro chistiones contra a su terrorismu internatzionale. De acoru ambos duos pro implementare implementare sa cooperatzione intre fortzas de politzia, in vigore dae su 2018 (redatzione).

url imàgine