Donald Trump, s’ex-Presidente de sos USA, est istadu incriminadu pro àere leadu dae sa Domo Arba documentos segretos e de importu e de los àere batidos in sa domo sua de su mare in Flòrida. S’acusa benit a pustis de s’àtera incriminatzione pro àere dadu dinari in manera illegale a Stormy Daniels: sa pornostar est istada pagada ca depiat custoire a s’imprenta chi issos duos aiant fatu sessu. Sos soddos però fiant de cussos dedicados a sa campagna eletorale.
Sa noa no l’ant dada sos òrganos de sa giustìtzia americana, ma Trump etotu in Truth Social, su social network chi at fraigadu pro fuire dae sas tzensuras chi l’aiant corfadu in sas àteras retzas sotziales. Tando non s’ischint a craru cale sunt sas imputatziones, ma si connoschiat dae meses s’indagu chi fiat fatende sa FBI a subra de su polìticu. S’acusa est grae meda: sos documentos si pensat chi siant istados furados pro los mudare, pro los fàghere a bìculos o los dare a calicunu de fora. Difatis intro unos cantos de custos b’aiant informatziones a subra de sas defensas e de sas armas nucleares americanas.
Est sa prima borta chi unu Presidente americanu est incriminadu, ma Trump, a su sòlitu, at faeddadu de una persighida contra a isse pro chistiones polìticas e chi custos protzessos no l’ant a firmare pro sa campagna eletorale pro sas eletziones presidentziales imbenientes.
Gabriele Tanda
Leave a comment