Sighint sas tratativas intre sotzialistas ispagnolos e indipendentistas catalanos pro chi b’apat in Madrid unu guvernu progressista. Ma non cun sos de Junts ebbia. In custas dies su presidente de sa manca republicana de Catalugna (Erc), Oriol Junqueras, at naradu chi «s’amnistia est sa cunditzione netzessària ma non bastante pro sa solutzione de su cunflitu». A bisu de s’esponente indipendentista tocat a aprontare unu referendum pro s’autodeterminatzione de sa chi como est una comunidade autònoma ebbia (sos Paisos catalanos sunt una cosa prus manna). In un’intervista a su giornale La Vanguardia, Junqueras ammentat a Pedro Sánchez chi si est beru chi su partidu suo est impignadu («comprometido») pro sa democratzia, tando est beru finamentas chi si devet impignare pro chi sos catalanos potzant disinnare su deretu issoro de si seberare su benidore. Sa chistione de sas responsabilidades, pro Junqueras, est fàtzile a l’acrarire. Si in s’istadu ispagnolu b’ant a àere unu guvernu o eletziones noas no est cosa chi dipendet dae sos indipendentistas, ma dae su Psoe, est a nàrrere si at a èssere issu «a impedire una majoria progressista dende oportunidades noas a sa dereta e a s’estrema dereta e refudende cosas chi pro su bonu de sa sotziedade catalana sunt giustas, comente s’amnistia o su de pòdere disinnare sa chistione catalana in manera democràtica». S’amnistia duncas cunditzione netzessària: «Est dae tempus chi semus traballende conca a custa punna. Semus traballende pro sa liberatzione de sos presoneris polìticos, pro sa torrada a domo de sos esiliados – unos cantos sunt resèssidos a torrare – e pro sa modìfica de sa Còdighe penale pro s’abolitzione de su reatu de seditzione». Ma comente est chi at a èssere cunditzione non bastante? narat Junqueras chi s’amnistia «no est su puntu finale de nudda, petzi su comintzu».
màuru piredda
Leave a comment