Sas trampas finantziàrias sunt mudende pedde e prataformas. Cunforma a su chi essit dae su Revolut Consumer Security and Financial Crime Report FY25, su crìmine econòmicu est vivende unu cambiamentu mannu: sa “lìnia de su fronte” est oramai prus addae de sas app finantziàrias. Sos social diant pàrrere como su campu privilegiadu, e custu resumu evidèntziat una crèschida drammàtica de sos fràudos in Telegram.
S’annu coladu, sa prataforma at registradu un’aumentu de su 30% de custas atziones cunforma a su 2024, arrivende a pesare pro prus de su 20% de su totale de sas trampas de tipu App (Authorized push payment). Cun custu brincu, Telegram nch’at coladu a WhatsApp e s’est afianchende a Facebook comente motore printzipale de s’economia de su crìmine. Su setore prus interessadu in custa app est su de sos “job scams” (trufas in contu de ofertas de traballu), sa categoria cun sa crèschida prus lestra a livellu globale, raddopiada in un’annu ebbia.
Telegram est oe s’orìgine de su 58% de totu sos fràudos ligados a su traballu (fiat su 50% su 2024). Sos malintragnados isfrutant sa vulnerabilidade econòmica cun annùntzios farsos chi pedint pagamentos antitzipados pro formatzione o atretzaduras inesistentes. In pare cun WhatsApp, sos servìtzios de messagìstica direta gestint oramai su 79% de custos fràudos e su 60% de cussos in contu de investimentos.
S’Itàlia si presentat comente unu casu crìticu in custu iscenàriu: inoghe Telegram si cunfirmat su printzipale vetore in su panorama europeu; cun su 34% de sas vìtimas intertzetadas in sa prataforma, s’app registrat s’intzidèntzia prus arta de sos mercados analizados, colende·nche sa Germània (27%) e sa Frantza (25%). A bisu de Revolut, sa solutzione est in sa responsabilidade cumpartzida: sas prataformas comente Telegram diant dèvere implementare controllos lestros pro blocare sa trufas a comintzu.
Gianfranca Orunesu
(In sa foto sa cobertina de su report de Revolut)
_______________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment