Non b’at coladu tempus meda dae cando Google nd’at bogadu prus de 180 aplicatziones – chi ant barigadu sos 56 milliones de iscarrigamentos – dae su Play Store. Su motivu? Una trampa publitzitària chi faghiat pagare a sos insertzionistas pro interatziones utentes farsas. A minudu, sos malintentzionados creant aplicatziones connòschidas comente “Vapor”, chi parent legìtimas e populares (pro fàghere unos cantos esempros, intortzas o iscansionadores de còdighes QR).
Collaborende cun s’agentzia IAS (Integral Ad Science), Google at agatadu e bogadu sas aplicatziones tramperas. A cumintzu, s’IAS aiat proadu cun unos cantos agiornamentos de seguresa, ma a pagu est serbidu.
Faghende un’anàlisi de custa campagna, s’ingannia non pertocat aplicativos malèsigos. Est, in realidade, una manera pro fàghere crèere a sos insertzionistas chi sunt paghende pro interagire cun sos utentes cando, imbetzes, sas relatziones sunt fitìtzias. Sos annùntzios publitzitàrios non nche lompent a sos fruidores e, gasi, sas campagnas de marketing las arruinant ca non podent acumprire a utentes reales. Est fàtzile meda a intuire cantas pèrdidas econòmicas depent sufrire sos isvilupadores e sos insertzionistas chi nche ruent in custa frigadura.
Sos creatores de custa campagna fartza ant agatadu mètodos pro nche barigare sos controllos e sighire a annànghere aplicatziones “Vapor”.
E tando ite faghet su colossu de Mountain View? Pro megiorare sa seguresa, a Google Play Protect l’ant a potentziare a manera chi potzat avisare a sos utentes pro chi disabìlitent sas aplicatziones incriminadas.
Pro non rùere in sa trampa, est pretzisu chi finamentas sos fruidores diant cara a su chi iscàrrigant dae su Play Store ca, tzertas bortas, si podet pensare chi siat s’aplicatzione giusta ma, in realidade, est una còpia produida dae aziendas pagu trasparentes.
Gianfranca Orunesu
(Foto de Andrey Matveev)
Leave a comment