A unu miràculu sunt in pagu a bi crèere, ma est craru chi niune cheret agabbare un’istajone positiva in una manera gasi mala. Domìniga sa Torres, a sa prima essida in sos playoff pro sa B, at pèrdidu contra a s’Atalanta U-23 cun unu resurtu chi faghet assuconare: 7 a 1. Si ischiat chi fiat una partida difìtzile meda (l’aiamus iscritu inoghe), ma nemos pensaiat a unu disacatu de custa mannària. S’iscuadra de Tàtari at sufertu mescamente sa gioventude e s’atza chi s’under 23 de s’Atalanta at batidu in campu. Difatis, sos lombardos sunt sos prus giòvanos de sos playoff, a s’imbesse sa Torres at un’edade mèdia chi est sa prus arta.
Su primu tempus pariat in echilìbriu fintzas a su minùtile 24, cando Vavassori at sinnadu sa prima retza cun unu tiru dae a tesu. Dae cuss’atzione in binti minùtiles sos nieddos-biaitos nd’ant sinnados àteras tres. Cun una tripleta de Vavassori e unu goal de Vlahovic, chi s’est leaudu su rolu de òmine de sos assist in prus de una situatzione. In su segundu tempus sa Torres proat a fàghere carchi cosa, ma sos contrapees la corfant tres bortas cun una tripleta de Cassa, chi fiat intradu in logu de Vavassori. Una retza ebbia de sos tataresos, de Luca Zamparo, chi nessi sarvant sa dignidade.
Sa ruta est mala e solovrat totu in unu sas isperas de sos tifosos. Paret chi s’istajone siat agabbada e petzi unu sero ispantosu podet acontzare custa pèrdida. Sa sotziedade at fintzas iscritu unu comunicadu pro espressare totu cantu su dispiaghere suo e pedire iscusa a sos chi sighint s’iscuadra. Est craru chi unu sonnu malu de custa genia est pesende dudas e su bisòngiu de torrare a fraigare dae nou totu su progetu de riforma. Ma bisòngiat de si ammentare su caminu fatu e sos resurtos ispessados chi su grupu at achipidu: custos pensos e una “futa” frita depent ghiare istasero a sas 20 in su Vanni Sanna sa Torres de Alfonso Greco, nessi pro sarvare sa cara a dae in antis de sa tzitade sua o, forsis, fàghere meda de prus.
Gabriele Tanda
Leave a comment