In sa die de s’iscadèntzia sa Presidente Todde at numenadu sos commissàrios de sa Sanidade, sena faeddare cun su PD, s’alleadu prus mannu chi at in su Cussìgiu.
Su 11 de martzu sa majoria ghiada dae sos de su Movimento 5 stelle aiat votadu sa riforma de sa Sanidade chi at sa punna de megiorare su sistema de sos ispidales de s’ìsula a pustis de sa riforma Solinas, chi no agradat a sos chimbe isteddos e a sa manca. Su passàgiu in mesu est s’inditu de sos cummissàrios chi pro ses meses ant a amministrare sos entes. Sos tempos però si sunt allonghiados e non si renessiat a lòmpere a sos nùmenes e tando, sa Presidente, at sèberadu issa a sa sola.
Su PD aiat pedidu àteras deghe dies, ma Todde, at cherfidu abarrare in sas règulas e istare intro de s’iscadèntzia. Tando, dumìniga at riunidu sa Giunta e at formalizadu sas nùmenas cun su PD, chi pro protesta, no at partetzipadu. In su documentu chi acrarit su pro ite si leghet chi no at cherfidu istorbare su caminu de sa riforma, ma chi no est de acordu cun sa manera sighida dae Todde. S’alleàntzia intre sas fortzas de su campu largu no est mai istada gasi dèbile e sos problemas si sunt annanghende un’a s’àteru.
In prus, francu sa cuntierra intro de sa majoria, b’at semper s’arriscu chi su guvernu potzat firmare su disinnu de riforma de sa Sanidade e chi custu caminu chi at fatu andare a tardu fintzas sa finantziària siat istadu in de badas.
Pro sa crònaca sas ghias noas de sas aziendas sanitràias sardas sunt custas:
– Asl 1 de Tàtari: Paolo Tauro
– Asl 2 de sa Gaddura: Ottaviano Contu
– Asl 3 de Nùgoro: Angelo Zuccarelli
– Asl 4 de Ogiastra: Diego Cabitza
– Asl 5 de Aristanis: Federico Argiolas
– Asl 6 de su Campidanu de mesu: Maria Francesca Ibba
– Asl 7 de su Sulcis: Andrea Marras
– Asl 8 di Casteddu: Aldo Atzori
– Arnas Brotzu: Maurizio Marcias
– Aou de Casteddu: Vincenzo Serra
– Aou de Tàtari: Mario Carmine Antonio Palermo
– Areus: Angelo Serusi
Gabriele Tanda
Leave a comment