S’annu nou de sa Presidente de sa Regione s’est abertu cun una noa pesosa: sos contos currentes suos e de su partidu in sa campagna eletorale fiant triulados gasi meda chi su cullègiu de garantzia eletorale de Sardigna l’at decrarada ruta dae su rolu de cussigera e tando fintzas dae Presidente. Issa at fatu ricursu pro suspèndere s’atu, chi però est istadu refudadu e tando su 20 de martzu su protzessu at a inghitzare.
Sa neghe segundu a su cullègiu est chi sos contos currentes dedicados a sas eletziones non fiant partzidos a craru dae cussu personale de Todde, chi paret, aeret pagadu bulletas chi pertocaiant a su comitadu. In prus no at inditadu unu mandatàriu, chi serbit pro compidare sos gastos e sighire sa burocratzia, e chi pro sa lege si depiat numenare.
Est craru chi custa situatzione est un’istorbu a sos traballos de sa Giunta, ca sa possibilidade chi potzat cambiare totu in pagu tempus no dat fortza a sos sèberos chi Todde podet fàghere fintzas a cando non s’at a acrarire su benidore suo. Si pesant dimandas: “sas lìneas chi est disinnende sa Giunta, pro cantu ant a èssere in vigore?” “no est chi s’incumintzat una riforma e a pustis at a abarrare mesu fata e mesu nono?”
Paga seguresa, ma Todde est proende a parare fronte. Fintzas a su 20 de martzu Todde non s’at a firmare, ca b’ant problemas mannos e chistiones abertas de importu: sanidade, nùmenas in sas Asl e su bilàntziu.
B’at chie narat chi sa die at a serbire petzi pro incumintzare sa dibata e nudda de prus; chie narat chi mancari sos giùighes ant a leare una medida a subra de sa ruta de sa Presidente, su detèrminu finale depet colare dae su Cussìgiu regionale, chi no at gana peruna de torrare a sas eletziones. Est craru però chi si sa decadèntzia at a suprire, Todde at a èssere tzopa, dèbile prus de cantu giai est a pustis de sa cuntierra a subra de sas àreas idòneas: atacadas dae intro e dae su guvernu, e sena nemmancu sa legitimidade.
Gabriele Tanda
Leave a comment