Su Terre di confine Film Festival su 18 de nadale in Solarussa oferit s’anteprima de sa de batòrdighi editziones. S’apuntamentu est in sa Domo Naitana a sas ses de sero.
A introduire s’eventu ddo’ant a èssere su sìndigu de sa bidda Mario Tendas, su presidente de su sòtziu Su disterru Onlus Sandro Sarai e su diretore artìsticu Paolo Zucca, regista de pellìculas che a L’arbitro e L’uomo che comprò la Luna.
Ocannu s’istadu chi est dedicadu su festival est sa Sèrbia.
Sas òperas presentada ant a èssere duas. Sa prima est Cercando Grazia, de Maria Grazia Perria. Est unu mediometràgiu chi ammustrat ùndighi pitzocas sardas seberadas pro interpretare s’iscritora giòvana in unu filmi dedicadu pròpiu a sos annos de sa pitzinnia de s’autora nugoresa, L’amore e la gloria, de sa matessi regista, chi est in fase de realizatzione
Perria, regista e iscenegiadora, at iscritu intre sos àteros Pesi leggeri, de Enrico Pau.
Sa segunda pellìcula est imbetzes unu curtzumetràgiu de Paola Cireddu intituladu L’uomo del mercato, ambientadu in su mercadu ortofrutìculu de Casteddu.
Protagonista de su contu est Mario, chi bivet regollende e torrende a bèndere cassetas de frutòra bòidas. A dd’interpretare sa regista at chertu a issu etotu, personàgiu reale. Dd’acumpàngiant totu atores non professionistas, francu Sergio Piano.
S’òpera de Cireddu, giornalista e fotògrafa, at bintu giai paritzos prèmios: mègius òpera in Il Cantiere delle Storie de su Premio Solinas in Sa Madalena in su 2017, su Labor de su V-art Festival Internazionale Immagini d’Autore (2020-2021), mègius curtzumetràgiu in sa setzione Emergenti de su Pop Corn Film Festival del Corto in Porto Santo Stefano in su 2021, mègius curtzumetràgiu regionale in su Figari Film Fest de Terranoa in su 2021 e su primu prèmiu FASI Visioni Sarde in su 2021.
Su Festival tenet sos cuntributos de sas biddas de Asuni e de Solarussa e s’agiudu de sa Regione Autònoma de Sardigna.
(gianni muroni)