Si pensamus chi sas punnas de annessione pertochent sa Rùssia e sa Tzina ebbia, cheret chi fatzamus unu brincu a Venetzuela, ca cras in sa gasi narada Repùblica bolivariana, sos tzitadinos ant a votare unu referendum particulare. Ca b’at unu territòriu chi oe est parte otzidentale de sa Guyana ma chi Caracas reclamat comente cosa sua. Semus faeddende sa Guayana Esequiba. Sa cosa est betza ca custu chirru fiat parte de su Venetzuela in tempos de colonialismu ispagnolu. Cun s’indipendèntzia venetzuelana dae Madrid (1811) sa Guayana Esequiba fiat terra cuntèndida dae àteras potentzias coloniales: Paisos bassos in antis e Rennu unidu a pustis (pro custu est chi in Guyana faeddant in inglesu). Cun s’indipendèntzia de sa Guyana dae Londra, su 1966, Caracas est torrada a reclamare sa zona e como Maduro at cunvocadu su referendum, in Venetzuela. Naturale, sa chistione non est petzi de màdrighe natzionalista ma fintzas de resursas. Ma si fintzas sos venetzuelanos narrerent chi emmo (a norma diant dèvere èssere sos de sa zona interessada a nàrrere cun chie cherent istare), cale diat dèvere èssere sa cunsighèntzia? Su guvernu de Georgetown at naradu chi s’at a opònnere. E duncas?
redatzione
Leave a comment