Sa novidade l’aiat antitzipada s’isvilupadore Mishaal Rahman su mese de ledàmine e como est ufitziale. Sa versione de 15 de Android (chi, ammentemus·nos·lu, movet dae su kernel Linux), permitit s’atzessu a una shell de un’ambiente virtualizadu de Debian in ue si podent esecutare sos aplicativos Linux chi Android non ponet a disponimentu in forma nativa.
Su vantàgiu printzipale de custa innovatzione est sa seguresa: sa màchina virtuale, difatis, impedit chi interferèntzias esternas potzant cajonare dannu a su telèfonu. Pro impreare sa funtzionalidade noa, tocat de ativare sa modalidade isvilupadore e, a pustis, abilitare s’atzessu a su terminale andende a Impostatzioni – Sistema – Opzioni per sviluppatori – Ambiente di sviluppo Linux.
Tocat posca de isetare s’iscarrigamentu de belle 500mb de datos e fàghere carchi configuratzione (pro nàrrere, sas impostatziones de sa rete).
Una borta acumpridos custos passàgios, s’aplicatzione Terminal at a essire a campu intre sas chi sunt a disponimentu.
Pro como, custa optzione est possìbile a l’àere petzi in sos dispositivos Pixel cun s’ùrtimu Feature Drop. S’intentu de Google est de afortire su nùmeru de sas aplicatziones Linux in Android, e su terminale est pro seguru un’istrumentu in prus in sa bèrtula de amantiosos e isvilupadores.
Sa versione integrada de Debian non tenet un’interfache gràfica (chi at a lòmpere cun sa versione 16 de Android) ma la podimus cunsiderare unu passu a dae in antis pro su chi pertocat s’interatzione cun su sistema. Abarrat, duncas, sa forma testuale pro ischerta de su colossu de Mountain View. Su terminale Linux s’est isvilupende a lestru: dae pagu at introduidu su suportu a sas ischedas mùltiplas e, cun probabilidade manna, luego b’ant a èssere àteras novidades.
S’obietivu de custa funtzionalidade, semper e cando, est – comente pretzisat Google – su de b’àere prus aplicatziones in Android ma non de annànghere un’àteru ambiente desktop.
Gianfranca Orunesu
(Immàgine dae Pixabay)
Leave a comment