Domìniga 12 de maju est in programma in Tàtari sa de setantatrès editziones de sa Cavalcada Sarda.
Sa manifestatzione est articulada in duas dies. Sàbadu 11 a sas ses de sero in pratza d’Italia ddo’at a àere un’antìtzipu de sa festa cun s’esibitzione de grupos folk e cantadores pop: Piero Marras, Maria Luisa Congiu, Baz, Le Balentes, Giuliano Rassu, Cecilia Concas, Luciano Pigliaru, Beppe Dettori & Giovannino Porcheddu, Alessandro Catte, Clara Farina, Antonio Tanca, sos Paesaggi Sonori de Roberto Tangianu & Peppino Bande, Enzo Mugoni, sos Zeppara, Emanuele Garau, su violinista Gianbattista Longu.
Su mangianu de su 12, a sas 9:00, sos sessanta sòtzios e grupos, seletzionados dae su diretore artìsticu Giuliano Marongiu, ant a isfilare, in òrdine alfabèticu, dae cursu Cossiga, in dae in antis de sa crèsia de Santu Zusepe, e ant a passare in s’emitziclu, in bia Brigata Sassari, in bia Cagliari, in pratza d’Italia finas a bia Roma. A coa de sos grupos ant a isfilare sos caddos, in rapresentàntzia de 11 biddas.
A su sero, dae sas bator e mesu, in s’ipòdromu, ant a cùrrere sas parìllias. A sas ses imbetzes, in pratza d’Italia, at a tocare torra a sos grupos folk, chi s’ant a esibire in cantos e ballos.
In prus, a chie est interessadu podet bisitare su padillione de s’artesania Eugenio Tavolara, in sos giardinos pùblicos. In ie sunt espostos produtos e trastos de pintura, iscultura, architetura e produtzione visuale a intro de sa mustra L’Onda Nuragica.
S’oràriu est dae sas 10:00 a sas 13:00 e dae sas 17:00 a sas 20:00. Sa mustra est aberta dae su martis a sa domìniga.
A chie imbetzes cheret assìstere a s’isfilada sètzidu in sas tribunas de pratza d’Italia podet comporare sos billetes a 30 èuros, prus 4,5 èuros de prebèndida, o in bia Roma 144, in ue Le Ragazze Terribili, o in sa piataforma in lìnia ticketone.
(gianni muroni)
Leave a comment