Sas ideas republicanas, fìgias de s’Illuminismu e de sa ratzionalidade, ant punnadu pro sèculos a partzire sa religione e s’ètica dae sas fainas de s’Istadu: su chi pertocat a sas istitutziones est de seberare su chi est legale dae cussu chi no lu est, pro su restu, mescamente pro sos setores de s’espressada personale, sa libertade diat èssere sa prus manna chi si podet. Custu pensu, est galu giustu?
Sos tempos chi non si podiat mentovare “membro” o brullare a subra de su Presidente de sa Repùblica in su televisore, ca non giuaiat a sa pùblica pudighèntzia, sunt colados dae meda. E fintzas su tempus de cando si batiant in tribunale sos libros o sos film est agabbadu. Como si corfat su chi faghet male a sa salude de sas persones, comente su fumu e s’alcol, o sas atziones perigulosas, comente cussa de non si pònnere sa chintòrgia in sa vetura.
Ma bi est unu setore chi fuet dae custas règulas: sa pornografia.
Difatis, in su 2006 su guvernu Berlusconi at seberadu de pònnere una tassa de su 25% in prus a chie produit e cummèrtziat custa genia de vìdeos. In Itàlia produire pellìculas chi ammustrant sessu est legale e finamentas tassadu che a unu cale si siat traballu cun un’alìcuota chi sighit sas intradas, ma in prus a custas b’at s’annanta de una tassa de un’àteru cuartu de sas intradas pro una chistione ebbia: pro s’Istadu sa pornografia no est ètica. Cun sa crèschida de su setore in internet sa chistione at tocadu persones chi girant a sa sola e chi non sunt domos de produida mannas.
Calicunu podet nàrrere chi su gènere non faghet bene a sos prus giòvanos e che tando bisòngiat de lu tzensurare. Ma cussa genia de medida bi est, tropu fàtzile a la inghiriare forsis, ma bi est. E tando sas dimandas sunt àteras: semus seguros chi bìdere sessu est prus pagu morale de bìdere violèntzia? O chi faghet peus de produire armas? Custa tassa est una disegualidade fiscale? Seguros semus chi sa còntiga morale, unu cras, non potzat corfare àteros setores?
Pro sos Radicales cust’imposta tocat de la bogare dae su sistema pro duas resones. Ca benit dae unu pensu èticu, setore però chi non pertocat s’Istadu ma sa persone e ca fràigat diferèntzia intre traballadores. Pro custu est inghitzada sa regorta de firmas pro unu referendum:
https://firmereferendum.giustizia.it/referendum/open/dettaglio-open/5600018
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment