Foto leada dae su situ ufitziale de sos Philadelphia Eagles
Domìniga 9 de freàrgiu, sas primas oras de lunis 10 in Itàlia, in su Caesars Superdome de Nova Orleans ant giogadu sa de barantanoe editziones de su Super Bowl, sa finale de su campionadu NFL (National Football League) de fùbalu americanu, eventu isportivu, su prus bidu de sos USA, e in prus ispetàculu televisivu chi lompet a tènnere finas valore polìticu.
Est istada sa prima editzione a bìdere sa presèntzia in s’istàdiu de unu presidente in càrriga. Trump at chertu finas ammentare sas vìtimas de s’atentadu terrorìsticu chi est istada teatru sa tzitade de sa Lousiana sa prima die de ghennàrgiu. Sos 15 mortos ant tentu unu momentu de omenàgiu in antis de sa partida.
Su càmbiu de indiritzu polìticu in Amèrica s’est bidu cun sa detzisione de eliminare s’iscrita End Racism chi fiat posta a sa fine de s’àrea de meta dae su 2020, in lìnia cun sa volontade de s’amministratzione Trump de serrare su programma DEI (Diversity, Equity, Inclusion), cunsideradu dae sos republicanos discriminatòriu a s’imbesse.
Cunforma a sa traditzione, a metade partida ddo’at àpidu un’esibitzione canora, de su cantante rap Kendrick Lamar.
Sa finale dd’ant binta, contra a sos favoridos de sos Kansas City Chiefs, chi aiant bintu sas ùrtimas duas editziones, sos Philadelphia Eagles de su tècnicu Nick Sirianni. Est su segundu trofeu pro s’iscuadra in màllia birde, su primu pro su head coach italoamericanu.
Su quarterback Patrick Mahomes, istella de sos Chiefs, est istadu protagonista in negativu cun 6 botzas intertzetadas, detzisivas pro sas marcaduras contràrias.
Giai a s’intervallu, a pustis de sos primos duos cuartos, sos Eagles fiant binchende 24-0, cun una meta de Dejean in deretura dae botza intertzetada.
Sos Chiefs sunt renèssidos a marcare pro sa prima borta in su de tres cuartos ebbia ma oramai fiat tardu.
Su prèmiu de su mègius giogadore in campu est andadu a su quarterback de sos Eagles Jalen Hurts, autore de sa prima meta de sa partida. Resurtadu finale Eagles 40 Chiefs 22.
(gianni muroni)
Leave a comment