Sunt belle 40mìgia in Sardigna sas impresas ghiadas dae fèminas, impitadas su prus in sos setores de sos servìtzios a sa pessone, in sa moda e in sas atividades de ristoratzione: su 23,9% de totu sas realtades produtivas de s’ìsula.
De custas, belle 6mìgia sunt impresas artesanas. Nùmeros chi s’agatant in s’anàlisi subra de sas impresas feminiles, ammaniada dae s’Ufìtziu istudios de Confartigianadu Impresas Sardigna e chi bogant a pìgiu unas cantas dificultades pro recuperare sos nùmeros pèrdidos pro sa pandemia.
In Sardigna, sa provìntzia ue s’agatant su bonu de sas impresas artesanas ghiadas dae fèminas, est sa de Casteddu, sighint Tàtari, Gaddura, Nùgoro e Aristanis.
E in su 2020 sunt istados sos traballadores indipendentes a patire prus de totus sa crisi: intre custos sas fèminas sunt istadas sas prus penalizadas. Sigundu Confartigianadu Sardigna sas istitutziones si depent impinnare a garantire a sas impresas ghiadas dae fèminas de sighire a traballare e de aumentare.
“Sas lìnias de su fundu Impresa femminile, chi in sa Lege de bilàntziu 2021 est de 40 miliones de èuro, integrados cun àteros 400 miliones, cunforma a cantu previdit su PNRR, – narat sa presidente de Confartigianadu Sardigna, Maria Amelia Lai – punnant pròpriu a investimentos pro s’aviu de s’atividade e agiudare a sa nàschida de impresas feminiles, pro s’afortiamentu de s’istrutura finantziària e patrimoniale de sas impresas giai aviadas e pro programmas e initziativas pro isparghinare sa cultura imprendidoriale feminile”.
Mariantonietta Piga
Leave a comment