Sa crèschida de s’impreu de s’intelligèntzia artifitziale no est trasformende s’economia globale e sas abitùdines digitales nostras ebbia, ma fintzas su profilu climàticu de sos territòrios chi òspitant sas infrastruras netzessàrias a la sustentare. Un’istùdiu reghente, chi sos resurtados los ant publicados in sa prataforma arXiv (https://arxiv.org/abs/2603.20897), nos ponet carchi anneu in contu de impatu ambientale de sos data center mannos.
Un’iscuadra internatzionale de chircadores at difatis cuantificadu, pro sa prima borta, su chi l’ant pesadu comente “data heat island effect”, est a nàrrere s’efetu ìsula de calore generadu dae sos polos computatzionales. Pro mèdiu de s’anàlisi de sos datos satellitares in meritu a sa temperadura superfitziale de sa terra (regortos sos ùrtimos deghènnios), sos istudiosos ant rilevadu una correlatzione direta intre s’ativatzione de sos hyperscaler e su riscaldamentu de sas àreas a làcana.
Sos datos sunt craros: a pustis de s’intrada in funtzione de unu data center prepostu a s’IA, sa temperadura de su terrinu a inghìriu suo creschet in manera mèdia de 2°C. Custa anomalia tèrmica creat zonas microclimàticas locales chi alterant s’echilìbriu de s’ecosistema regionale. Non diat pàrrere unu fenòmenu isoladu o de pagu cunsideru ca oramai s’iscala de su problema est globale. Cunforma a sas istimas de su raportu, prus de 340 milliones de persones nch’istant in logos chi diant pòdere sufrire sos efetos diretos de custa artziada tèrmica, cun cunsighèntzias mannas in contu de benèssere de sas comunidades e de sustenibilidade urbana. Su “data heat island effect” s’est duncas presentende comente un’elementu tzentrale de sas dibatas imbenientes. Cheret cumpresu si sas aziendas tecnològicas e sos guvernos, a pustis de custos datos, torrent a cunsiderare sa progetatzione e sa localizatzione de custas infrastruturas digitales.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22