Su presidente tzilenu José Antonio Kast at cumintzadu, su 6 de abrile, sa prima vìsita ufitziale sua, chi segundu sa traditzione, est semper a Argentina.
In càrriga dae s’11 de martzu, Kast, fundadore e esponente de su Partidu Republicanu, de destra, in su primu atopu cun su presidente Milei, at torradu a difèndere sa positzione de su paisu bighinu pro sa chistione Malvinas/Falkland.
In unu comunicadu unificadu de sas cantzillerias de sos duos Ministèrios de sos Afàrios Èsteros ddo’est iscritu ca su presidente Kast cunsiderat «legìtimos sos deretos de soberania de sa Repùblica Argentina pro sas ìsulas Malvinas, Geòrgias de su Sud, Sandwich de su Sud e sos tretos marinos totu a inghìriu e at torradu a afirmare chi sos Guvernos de sa Repùblica Argentina e de su Regnu Unidu diant dèpere torrare a negotziare pro atzapare, su prus in presse possìbile, una solutzione definitiva a sa disputa de soberania cunforma a sas risolutziones de sas Natziones Unidas e de àteros organismos regionales e multilaterales».
Aterunu tema tratadu intre sos duos presidentes est istadu su de sa cooperatzione contra a su terrorismu. Sa prima die de abrile de su 1991, un’annu a pustis de sa fine de sa ditadura de Pinochet, aiant mortu, in Santiago, a sa essida de sa universidade in ue fiat professore de deretu costitutzionale, a Javier Guzmán, de sa Unione Democratica Indipendente, partidu de destra.
S’atentadu mortale dd’aiat fatu de su Frente Patriótico Manuel Rodríguez, grupu terrorìsticu marxista-leninista. Unu de sos organizadores de custu atentadu fiat Galvarino Apablaza. Fuidu a Argentina, in freàrgiu de su 2026 dd’ant leadu su status chi teniat de rifugiadu polìticu.
S’operatzione de sa politzia argentina de dd’arrestare pro dd’estradare a Tzile, chida passada, est andada male e Apablaza est como latitante. S’arrestu de su terrorista fiat una de sas promitas eletorales de Kast, chi militaiat issu puru in s’UDI, su partidu de sa vìtima.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment