Su 28 e su 29 de maju, a sas oto de sero, su Teatru comunale de Tàtari aberit a su pùblicu cun s’orchestra de su cunservatòriu tzitadinu Canepa direta dae Andrea Raffanini.
S’orchestra, nàschida in su 2002, est cumposta dae unos sessanta elementos, totus istudiantes, ex istudiantes e maistros de su cunservatòriu. Su repertòriu andat dae sa mùsica baroca a su noighentos.
Raffanini, maistru de esertzitatziones orchestrales, est a sa ghia de s’orchestra dae sete annos e dirigit orchestras in àteros teatros puru, a livellu internatzionale.
S’at a esibire pro primu Carlo Cesaraccio in su cuntzertu pro òboe e orchestra KV 314 in do majore de Mozart. A coa Davide Mascia at a eseguire su Concierto de Aranjuez pro chitarra, de Joaquín Rodrigo.
Sos duos, dischentes de su cunservatòriu, sunt istados seberados pro s’esibitzione a pustis de un’auditzione.
In fines s’orchestra at a sonare sa de oto sinfonias in fa majore op.93 de Beethoven.
(redatzione)
Leave a comment