Dae s’agabbu de su 2024, sos giornales ant faeddadu de còmporas de bancas: prima Unicredit chi cheriat a su Bancu BMP e a pustis MPS, sa noa Monte dei Paschi chi at proadu a si nche leare a Mediobanca. Ma ite est capitende de a beru in s’economia bancària?
Sa luta muda chi est andende a dae in antis est fata dae duas famìllias de imprendidores de importu: sos Del Vecchio, meres de Luxottica, s’impresa prus manna de su mundu pro sa produida de otzales, e so Caltagirone, chi ant sa propiedade de «Il Mattino», su giornale de Nàpoli, de «Il Messaggero», su de Roma, e de àteras testadas prus minore. Ambas duas ant gastadu dinari meda in sos immòbiles.
Sas duas famìllias alleadas sunt proende a fraigare su de tres tzentru bancàriu italianu de pònnere a costàgiu de Unicredit e Intesa San Paolo. In sos annos colados ant, a lenu a lenu, comporadu cuotas de atziones de istitutos de crèditu finas a los controllare e a orientare sas lìnias e sos sèberos.
Un’esempru est sa sotziedade de asseguratziones Generali, chi est una de sa mègius impresas de su Paisu e chi at una partetzipatzione de su 17% partzidu intre sas duas famìlllias e chi li bastat pro pesare in s’andanta de sa sotziedade, mancari su presidente no est espressada issoro.
Sos Del Vecchio gestint totu custos afares cun sa holding — unu grupu de sotziedades — Delfin, chi at a intro siat Essilor Louxottica, s’acopiada de impresas de lentes e otzales, siat sas cuotas de sas bancas, siat, pro unu cantu prus minore, sos immòbiles e chi, dae 2022, cun sa morte de su fundadore Leonardu, est colada a sa mugere e a sos fìgios.
Sos Caltagirone sunt crèschidos fraighende domos maicantas a Roma, divenende meres de aziendas pùblicas privatizadas in sos annos Noranta. Tenet ligàmenes forte cun sa polìtica italiana e pro custa resone est inditadu comente unu de sos imprendidores prus potentes de Itàlia.
Si sos primos tenent un’alenu prus internatzionale, sos segundos ant s’imprenta e su poderiù dae s’ala issoro. Alleados ant a èssere semper de prus una fortza chi at a influentzare su Paisu.
Gabriele Tanda
Leave a comment