Su 22 e su 23 de martzu b’at a èssere su Referendum costitutzionale a subra de sa Giustìtzia. Sa dimanda no est simpre: «Approvate il testo della legge di revisione degli artt. 87, decimo comma, 102, primo comma, 104, 105, 106, terzo comma, 107, primo comma, e 110 della Costituzione approvata dal Parlamento e pubblicata nella Gazzetta Ufficiale del 30 ottobre 2025 con il titolo “Norme in materia di ordinamento giurisdizionale e di istituzione della Corte disciplinare”?» E si custa est sa dimanda, cheret nàrrere chi pro acrarire su chi capitat cun sa riforma bisòngiat de pedire a sos polìticos o a s’imprenta. Si sa sigunda proat a fàghere su traballu suo (pro esempru inoghe), sos primos sunt impitende sa chistione pro una batalla polìtica. Su Ministru de sa giustìtzia est atachende sa magistradura e s’organismu suo de bàrdia, su CSM, mentovende sa màfia. Sos partidos, de un’ala e de s’àtera, sunt ponende in mesu campagnas eletorales chi parent ammanigiadas dae pitzinneddos, nende chi su boboti, sos fascistas, sas surbiles e sos terroristas e àteros puru ant a votare, a segunda de chie faeddat, o pro su “Sì” o pro su “No”. De argumentos e de arresonos comente si tocat in sa polìtica paret chi non bi nd’apat.
Sa situatzione at infadadu finamentas su Presidente Mattarella chi oe est andadu a s’ispessada a una riunida de su CSM pro pedire chi sas partes si chietent e chi sos poderes de s’Istadu incumintzent a si cuncambiare unu agigu de rispetu.
Sa riforma punnat a partzire sa carriera de sos pùblicos ministèrios e de sos giùighes e a pustis fraigare duos CSM pro sas duas figuras. A su matessi tempus su guvernu at seberadu chi sos duos organismos de bàrdia sighint a si cumpònnere de una parte polìtica e una tècnica, custa ischerada però a estratzione. Sa timoria de sa magistradura e de sa manca est chi siat una manera de su guvernu de controllare su poderiu giuditziàriu.
Gabriele Tanda
Leave a comment