In Itàlia sos istipèndios sunt belle sos matessi de sos de trint’annos a como, antzis, sunt fintzas menguados comente poderiu de còmpora de su 8,7%. Est cussu chi essit a campu dae sa relata mundiale a subra de sos salàrios sestada dae s’Organizatzione Internatzionale pro su Traballu (incarca inoghe pro la lèghere), un’ente de sas Natziones Unidas chi analizat sos setores de su traballu e de sas polìtica sotziales. Fintzas s’OCSE (incarca inoghe pro lu lèghere) ammustrat comente s’Itàlia est unu de sos peus in contu de fàghere torrare su balore de sos istipèndios a comente fiant a dae in antis de su Covid.
Custa situatzione non b’intrat cun su càmbiu dae sa lira a s’èuro, ca si esseret gasi, fintzas sos àteros Paisos de Europa diant àere àpidu una situatzione simigiante, ma gosi no est. Difatis in Germània e in Frantza su balore de sos istipèndios est crèschidu de su 20% e de su 25%. Est pro custu chi fintzas si b’at prus traballadores, s’est ismanniende su nùmeru de sos pòberos.
Sas resones sunt medas e diferentes. Sa primu est chi in custos annos su PIL de s’Itàlia no est crèschidu, si non de pagu. Sas duas crisis econòmicas de su 2008 e de su Covid, posca, no ant dadu s’ocasione pro dare cara a sos problemas de su sistema, ma ant peoradu sa situatzione ebbia, ca sa classe polìtica intrea at annotadu a s’àtera ala.
Su problema, narat a «La Stampa» Andrea Garnero, economista de s’OCSE, est chi sos sèberos fatos in custos annos sunt andados fatu a sos setores traditzionales e no a cussos prus ligados a sa tecnologia nen a sos noos nàschidos in custos annos. Su pensu in fundu chi ghiat polìticos medas est su mitu de su turismu e de s’edilìtzia comente motores de s’economia. Un’idea betza mescamente in su mundu de s’intellighèntzia artifitziale, de sa robòtica e de sa finàntzia in totue.
Duos àteros problemas sunt chi sos cuntratos colletivos benint annoados cun tempos tropu longos, non dende sa possibilidade de una prus lestra acontzada a sos istipèndios; e chi sos traballadores non produint meda de prus de su chi balàngiant. No est neghe issoro chi sunt mandrones, ma de su fatu chi su sistema in ue traballant non prèmiat sa formatzione, ca meda bortas traballant in aziendas minores chi non renessent a annoare, e firmadas dae s’istorbu de sa burocratzia.
Gabriele Tanda
Leave a comment