A pustis de duas dies sa Regione at dèpidu sessare una protzedura de rechesta de agiudos pro sos traballadores de su setore turìsticu (su bandu fiat Destinazione Sardegna Lavoro). Su sistema aiat triuladu totus sas dimandas e pro istransire cale si siat cuntierra s’Assessoradu at rimandadu totu a su 18 de freàrgiu.
Sos operadores de su setore turìsticu si sunt chesciados ca, segundu issos, sa manera pro imbiare sas rechestas fiat simigiante a sa die de s’incarca, in ue chie lompet a s’inghitzu si leat su dinari, chie suprit a tardu, non leat nudda, sena pònnere in cunsideru perunu sa calidade de sas dimandas e s’apretu de sas aziendas. Custa manera de protzedura est istada cundennada fintzas dae su TAR e dae su Cussìgiu de s’Istadu. Pro custu sa Regione s’est defensada narende chi su problema est istadu petzi de su sistema informàticu, ma chi no fiat una die de s’incarca.
No est sa prima borta chi b’at àpidu problemas de custa genia, tando, ma custa borta benit posca un’atacu informàticu dae sos piratas de sa retza, chi sunt intrados in su cherbeddu de sos datos regionales e nd’ant furadu calicunu (cantos e de cale casta non s’ischit). Paret chi a los fàghere intrare siat istada una faddina de sos tècnicos de sa Regione etotu. A dies de oe su setore informàticu est de importu mannu, ma paret chi custa Giunta siat in dificultade a lu ammanigiare comente si tocat.
(redatzione)
Leave a comment