Mancari siant 66 sas editziones postas in archìviu, ocannu, cun sa de 67, su Prèmiu Otieri lompet 70 annos de vida. In custas dies, s’Aps “Premio Ozieri” ghiada dae Vittorio Ledda at bandizadu su regulamentu de su cuncursu literàriu su prus vidanu de Sardigna (su de 7 in Itàlia in òrdine cronològicu) cun sas tres setziones istòricas suas: poesias, contos e cantzones. Nàschidu su 1956 dae s’idea de su poeta e maistru Tonino Ledda, babbu de Vittorio, su Prèmiu at acumpangiadu s’evolutzione de s’iscritura in sardu e in sas variedades alloglotas (turritanu, gadduresu, tabarchinu e aligheresu). In unu tempus chi semper prus manna fiat sa pràtica poètica (pensemus ebbia a s’esperièntzia de sa rivista “S’Ischiglia”), su Prèmiu Otieri comintzeit a èssere su puntu de riferimentu pro sa dignidade literària de sa limba sarda.
S’editzione 2026 de sos 70 annos, pròpiu in contu de istòria, marcat una torrada de importu a sas orìgines suas: sa tzerimònia de premiatzione l’ant programmada pro su 26 de cabudanni, est a nàrrere pagas dies a pustis dae sa festa nòdida pro Nostra Sennora de su Remèdiu, cuntestu in ue su prèmiu nascheit. Naturale, custu antìtzipu cajonat un’iscadèntzia noa pro sa presentatzione de sas òperas: su materiale cheret imbiadu intro e non prus a tardu de su 31 de martzu (non prus in maju comente in sas editziones in antis).
Torrende a sas tres cambas de su cuncursu in gara, fintzas custa editzione est articulada in sas tres setziones istòricas chi abbratzant su ventàlliu intreu de sa produtzione literària: setzione “Antoni Sanna” (Poesia); setzione “Tonino Ledda” (Prosa); setzione “Antoni Cubeddu” (Tra Poesia e Càntigu). Ocannu, custa de tres tenet unu valore simbòlicu mannu: ruent difatis fintzas sos 130 dae sa prima gara poètica improvisada sarda, chi tiu Cubeddu li deit vida pròpiu in Otieri, in pratza de Cantareddu, su 1896.
Totu sas informatziones a minudu in contu de modalidades de imbiu (in pabiru o via e.mail), de prèmios pro sos primos tres classificados de onni setzione e de compositzione de sa giuria tècnica nche sunt in intro de su situ ufitziale www.premiozieri.it.
Gianfranca Orunesu
Leave a comment