Su libru mannu de su Prèmiu Otieri tenet como unu capìtulu nou. Est de martis su 25 de làmpadas s’assemblea costitutiva de s’assòtziu de promotzione sotziale “Premio Ozieri di letteratura sarda Aps”. Sa cungrega, chi dae deghènnios bi l’est sighende cun su prus de importu prèmiu literàriu in limba sarda, no est prus un’assòtziu culturale ebbia, ma un’ente de su de tres setores. Unu passàgiu netzessàriu cunforma a sa riforma reghente de s’ordinamentu in chistione, ma no un’òbligu acumpridu ebbia.
Cun sa costitutzione de s’Aps, su Prèmu Otieri punnat como a orizontes noos e prus mannos. Sos sèighi assotziados costituentes ant aprovadu s’istatutu nou chi, difatis, previdet carchi novidade. Comintzende dae sa possibilidade de otènnere contributos dae sos tzitadinos cando chi, chentza chi sa cosa lis costet, sunt dichiarende sos rèdditos issoro.
Su cussìgiu diretivu cunfirmat sos incàrrigos sotziales pretzedentes de Vittorio Ledda a sa presidèntzia e de Pierluigi Saba a sa visupresidèntzia. Segretàriu nou est Marco Fenudi in càmbiu de Antonio Canalis a pustis de prus de 40 annos de segretariadu in s’assòtziu. «Mai amus a sessare de li torrare gràtzias – narant Ledda, Saba e Fenudi – pro s’impignu suo sena pasu e pro àere fatu crèschere e evòlvere su Prèmiu sighende su caminu sestadu dae su fundadore Tonino Ledda». Antoni Canalis est como cussigeri in pare cun Paola Basoli.
Duncas su Prèmiu Otieri tenet como un’assòtziu nou e prus definidu a tretu de garantire una mègius continuidade a custa esperièntzia literària chi est ùnica in Sardigna.
«Cun s’Aps Premio Ozieri – agiunghent Ledda, Saba e Fenudi – sighimus punnende a sa valorizatzione de sa limba sarda e de sas limbas de Sardigna, finas pro mèdiu de su trabàgliu de catalogatzione de sas òperas lòmpidas dae su 1956 chi at otènnidu unu finantziamentu ministeriale, sena renuntziare a su protzessu de modernizatzione de su cuncursu e de sa poesia aviadu dae tempus in pare cun sa prus chi non cualificada Giuria ghiada dae su Prof. Dino Manca».
In custas dies s’assòtziu est definende su calendàriu de sos eventos conca a sa de 65 editziones de su cuncursu literàriu e chi ant a comintzare custu istiu.
Mentovadas intre sas finalidades de s’Aps fintzas sas collaboratziones cun àteros assòtzios e cun sos Entes locales. «Cheret chi ammentemus – serrant Ledda, Saba e Fenudi – sa collaboratzione cun s’amministratzione comunale de Otieri e s’interessu fitianu de s’assessore de sa Cultura Alessandro Tedde e de su sìndigu Marco Peralta chi lis torramus gràtzias mannas».
In s’assemblea sos assotziados ant fintzas ammentadu su contributu de su biadu de Gerolamo Squintu, unu contributu de passione e de ideas giutu a dae in antis dae sos tempos de Tonino Ledda.