Su 4 de abrile su guvernu at mudadu su disinnu de lege seguresa in unu decretu, brinchende totu cantas sas dibatas de su Parlamentu. In custa manera una chistione dìliga, lompet a lestru a sa mesa de Mattarella.
Sa resone de custu sèberu est chi pròpiu su Presidente de sa Repùblica aiat sutalineadu problemas mannos in contu de costitutzionalidade de sa lege. Segundu a isse sas medidas corfaiant genia de persones dèbiles, pro esempru sas persones in presone, fraighende ingiustìtzias noas. Su guvernu però non podiat cambiare prus su testu, ca su tempus fiat passadu a pustis de un’annu e mesu de dibata, sas chi lu podiant fàghere fiant sas fortzas de s’opositzione. Custu però cheriat nàrrere dare una bìnchida polìtica a sos aversàrios.
Ma de ite tenet custu decretu, e cale sunt sos problemas denuntziados dae Mattarella, dae sos professores universitàrios de deretu, dae s’Unione delle camere penali e dae assòtzios maicantos?
Divenit reatu su blocu istradale intro de una manifestada, cun ses annos de presone. Divenit reatu sa resistèntzia passiva, tando sena fàghere violèntzia peruna, a sas fortzas de s’òrdine: cando un’agente òrdinat carchi cosa, lu si depet fàghere ca si nono si podet èssere arrestados. Divenit reatu sa protesta contra a sas infrastruturas ligadas a sos setores de s’energia, de sos trasportos, de sas telecomunicatziones e de àteros servìtzios pùblicos. Divenit reatu s’ocupatzione de sos immòbiles, sena fàghere partzidura de sas resones (pro protesta o pro furare sa domo de calicunu). Divenit reatu sa bèndida e su coltivu de sa cannabis light, francu pro su sèmene. Divenit reatu sa protesta a intro de unu càrtzere o de unu tzentru de migrantes, fintzas si est patzìfica. A custos s’annanghent agravantes e règulas noas chi andant a corfare mescamente sas persones migrantes.
Dae s’àter’ala su guvernu at ismanniadu sas garantzias pro sos agentes de sas fortzas de s’òrdine: como ant una cobertura legale pagada dae s’Istadu si sunt acusados de crìmines fatos in sevìtziu. Fintzas sos servìtzios segretos ant un’amparu prus mannu, ma nessi nd’at bogadu s’òbbligu a sas universidade e a àteras istitutziones pùblicas de cumpartzire sos datos privados de sos utentes cun issos.
Custu testu de lege est un’atacu a su deretu de crìtica, de manifestada e de s’espressada lìbera de sas opiniones contra a su poderiu. L’ant cumpresu in medas e sas crìticas non sunt tzertu mancadas, ma su guvernu sighit a andare a dae in antis in su fràigu de una genia de Istadu de polìtzia.
Gabriele Tanda
Leave a comment