Immàgine leada dae vaticannews.va
In sa gherra contra a s’Iran, iscadenada dae Istados Unidos e Israele, at leadu positzione, in manera crara, su Papa. S’interventu de su Pontìfitze est arribadu a pustis chi Trump aiat minetzadu s’Iran cun custas paràulas: «Una tziviltade intrea at a mòrrere custu note e no at a torrare mai prus».
Dae Castel Gandolfo Leone XIV at naradu, su sero de eris martis 7 de abrile: «Oe ddo’at àpidu custa minetza contra a totu su pòpulu de s’Iran. Custu no est atzetàbile. Ddo’at de seguru resones de deretu internatzionale ma massimamente una chistione morale, pro su bene de su pòpulu. Dia chèrrere chi totus pensent in coro issoro a tantos innotzentes, tantos pipios, tantos betzos, innotzentes de su totu chi diant èssere vìtimas issos puru de custa escalation».
Su Papa at naradu a totus a pregare e a «chircare comente comunicare a sos parlamentares (americanos), a sas autoridades ca non cherimus sa gherra, cherimus sa paghe».
Prus a tardu ddo’at àpidu una novidade. Sas primas oras de s’8 de abrile, ora italiana, su presidente de sos Istados Unidos at comunicadu ca pro more de sa mediatzione de su primu ministru pakistanu Shehbaz Sharif at a suspèndere sos bombardamentos pro duas chidas. Sa cunditzione est chi s’istadu persianu torret a abèrrere de su totu s’Istrintu de Hormuz.
Trump at agiuntu ca at retzidu una proposta negotziale de 10 puntos dae s’Iran e chi custa est una base bona dae in ue partire.
A coa est arribadu, in risposta a sa decraratzione de Washington, unu comunicadu de su Cussìgiu Supremu de Seguresa Natzionale iranianu: «S’inimigu, in sa gherra sua ingiusta, illegale e criminale contra a sa natzione iraniana, at patidu una derrota innegàbile, istòrica e umiliante».
Sa prima reatzione a livellu econòmicu a sa situatzione noa est istadu unu calu de su 18% de su prètziu de su petròliu, lòmpidu a suta de sos 100 dòllaros a su barile.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment