Su Nuraghe Serra Madau de Biddesatu est unu de sos tantos nuraghes chi parent postos a tentare sos rios. Custu nuraghe, in particulare, est in s’oru de su riu S’Acqua Callenti, afluente de su Flumendosa.
Comente est a bi lòmpere?
B’at de colare in una badde astrinta e galana in ue curret faghende muina su Riu S’Acqua Callenti, rugrende in un’àndala percossosa prena de matas de chessa.Unu logu aspru, che a sos montigros chi b’at a fùrriu, belle impenetràbile. Est in pitzu de unu de unu de custos montigros chi su nuraghe Serra Madau si pesat lugorosu dominende sa badde. Pagas cosas gasi galanas podent abbaidare sos ogros, un’architetura donosa in simbiosi perfeta cun su logu, chi bogat profetu dae sa morfologia sua. Unu ligàmene forte chi addurat dae millènnios, chi nos donat galu oe unu sensu raru de paghe. Arroccadu in manera ispantosa subra de unu bastione naturale, su nuraghe est un’echilìbriu de contzos minores dolados bene, a filu cun su bòidu chi si ghetat in su birde.
In cue a probe, restos interrados de àteros fràigos formados dae codinas mannas essint a campu a oriente de sa turre e disinnant su profilu pedrosu de su logu
