Su nuraghe Miuddu

                                         de Salvatore Serra

In su cumonale de Bìrori, pròpiu a curtzu a su caminu in ue colant sas màchinas, b’est su nuraghe  Miuddu. Est unu nuraghe cumplessu, formadu dae una turre de mesu inserrada  in unu bastione trilobadu. Nche torrat a su 1400-1000 a.C.   A sa turre tzentrale a pranta tunda (diàmetru 11 m.) si podet intrare oe colende in s’abertura de s’iscala elicoidale chi nche giughet a  su paris de susu, cando chi s’intrada de unu tempus non b’est ca nch’est ruta. Dae s’iscala    si intrat a unu passadissu  in ue b’at unu nitzu, e duncas si lompet  a sa càmera tzentrale. In custu  ambiente a “tholos” b’at tres nitzos postos in rughe. A curtzu a su de tres nitzos, in su pamentu de sa càmera, s’aberit unu putzu “a ampulla”, chi su paramentu muràriu suo est fatu cun blocos minores postos in filera.

Sas pinnas de sa  càmera sunt fatas  cun blocos poligonales de mannària diferente, postos a fileras irregulares cun medas cotas de afortimentu. Su bastione – cun s’intrada  a Sud – inserrat tres turres a pranta tunda postas  in s’ala Nord.  In s’ala Est, cosa curiosa, non b’est sa de bator turres, chi sa forma cuadrangulare de su bastione diat fàghere pensare chi bi siat.

Su  monumentu est inghiriadu dae un’ antemurale mannu chi inserrat, in s’ala de Sud, unu pinnetu cun s’intrada a Nord.