– de Salvatore Serra –
Su Nuraghe Losa est unu de sos monumentos nuraghesos prus de importu e mègius mantesos.
Postu a 304 metros de artària in una campeda de roca basàltica probiana a sa bidda de Abbasanta, si podet bìdere bene colende in sa 131 Casteddu-Tàtari in su de sa giuntura pro Nùgoro-Terranoa (131 bis). In cue a curtzu bi sunt finas sos restos de una tumba de gigantes.
Fraigadu totu in sa roca basàltica, est formadu dae una turre e dae unu bastione trilobadu inghiriadu dae un’ antemurale.
Totu su cumplessu nuraghesu, contende finas sa bidda, est inghiriadu dae una chinta murària vagamente ellissoidale de 172 pro 268 metros.
Sa turre nche torrat a sos sèculos XV–XIII a.C., cando chi su bastione, s’antemurale e sa chinta murària nche torrant a sos sèculos XIII-agabbu XII.
Giai in sa prima Edade de su ferru sos repertos mustrant unu minimòngiu in s’abbitu de su giassu, chi però no nche ruet de su totu in disusu.
Su cumplessu l’ant impitadu finas pro impreos funeràrios, comente mustrant sos repertos de sos sèculos VII–VIII .
Sos primos iscavos los at fatos Leon Gouin in sos otanta de su sèculu XIX, pustis b’at traballadu Filippo Vivanet, agiuadu dae Filippo Nissardi, dae su 1890.
In su 1915 Antonio Taramelli at ghiadu una campagna noa de iscavos boghende a lughe istruturas noas e sa bidda chi b’est a fùrriu. In sos annos Chimbanta de su Noighentos Giuane Lilliu at classificadu totu sos repertos imbènnidos finas a tando.
In sos annos Setanta Ferruccio Barreca at fatu àteros iscavos e interventos de restàuru, faghende a manera chi su monumentu esseret visitàbile.
Dae su 1989 a su 1994 b’at àpidu àteros istùdios in sa turre e in su bastione.
Leave a comment