– de Salvatore Serra –
Ocannu chi benit un’àteru naviu ispatziale at a tzucare a Giove, pro chircare de iscobèrrere si una de sas lunas suas, Europa, podet agasagiare sa vida. Però in su naviu non b’at a àere istrumentos tecnològicos ebbia, ma finas una poesia de sa poetessa nordamericana Ada Limón: “Bàntidu de su mistèriu: una poesia pro Europa”). E b’at a àere sos nùmenes de chentinas de mìgias de pessones.
Su bostru diat pòdere èssere unu. Sa NASA pedit a sos interessados de imbiare sos nùmenes issoro in antis de su cumintzu de sa missione, in su mese de santugaine de su 2024. Totu sos nùmenes imbiados in antis de s’agabbu de su 2023 ant a biagiare in s’ispàtziu in su naviu Europa Clipper, chi at a intrare in s’òrbita de Giove in su 2030.
Europa est una de sas 95 lunas de Giove reconnotas in manera ufitziale. L’ant seberada pro sa missione ca podet dare chi tèngiat abba lìchida e finas sas fontes de energia e sas sustàntzias chìmicas chi faghent possìbile sa vida.
Mancari su pìgiu siat cugugiadu de astra, paret chi in suta Europa tèngiat un’otzèanu lìchidu mannu, e s’atividade chìmica suta de s’abba diat pòdere produire sas cunditziones netzessàrias pro sustentare organismos bios. Belle chi sa lughe de su sole non podet pertùnghere s’astra de Europa, sos sientzados creent chi sas radiatziones de Giove diant pòdere provìdere una bena de energia profetosa.
In sa pàgina web de sa NASA b’at iscritu chi finas a como sunt lòmpidos unos 700.000 nùmenes. Sos nùmenes los ant a registrare in unu microchip de sa mesura de una moneda de 10 tzentèsimos, chi l’ant a fissare in una placa metàllica in ue ant a iscrìere sa poesia.
A cherides intrare in parte? Sa NASA atzetat nùmenes finas a su 31 de nadale de su 2023 a sas 05.59 (ora de inoghe). Pro partetzipare, visitade su situ go.nasa.gov/messageinabottle.
Leave a comment