Gianteris Su Ministru de s’Ambiente e de sa Siguresa energètica, Gilberto Pichetto Fratin, at annuntziadu chi su progetu chi dae annos girat in sos aposentos de sa polìtica est lòmpidu a sa fine sua, sena mancu èssere inghitzadu. Semus faeddende de su disinnu de fraigare unu depòsitu ùnicu pro totu s’arga nucleare de s’Itàlia. Bator e prus annos a como pariat chi s’Istadu fiat prontu (comente amus iscritu inoghe), ma a pustis nemos at fatu nudda. Si fiat gastadu dinari maicantu e si fiant postos critèrios: cuddos sunt istados furriados; custos non sunt istados sighidos. Difatis a lèghere su documentu essidu dae sa Sogin, s’ente pagadu pro lu iscrìere, non si podiat fàghere in sas ìsulas, ma a s’imbesse in custos annos su nùmeru de sos giassos est faladu, ma sas biddas sardas sunt abarradas in sa lista.
Sa decrarada de su Ministru est un’àtera proa chi de sos guvernos italianos non si bi podet pònnere fide meda: soddos betados in su muntonàrgiu, règulas fissadas e violadas, punnas chi cambiant a sighidura, timoria de seberare. Un accordu como, non s’ischit cale pìgia podet leare unu cras.
Su guvernu Meloni tenet s’idea de torrare a su nucleare e giai cussa est una noa, ca s’Itàlia at votadu duas bortas pro no intrare in cuss’àndala. Sa Sardigna, in prus, at votadu e, dae tempus, at postu a craru in su Cussìgiu chi refudat cale si siat impinnu e fràigu chi pertocat su nucleare. Però su guvernu at pedidu a totu sas Regiones de li dare una delega pro sos affares nucleare. Pro fàghere ite? Su nucleare de “quarta generazione”, nanchi, una paristòria chi no esistit, ma chi cuat sa possibilidade de gastare àteru dinari, pro un’infrastrutura chi forsis podet incumintzare a produire nessi intre bint’annos. Su problema est chi imbertu in s’acordu bi podet èssere fintzas sa possibilidade de àteru, comente su depòsitu ùnicu denegadu dae su Ministru.
Bene at fatu sa Presidente Todde a non firmare sa delega. Bisòngiat de bìdere si custa cuntierra non si potzat ligare a cussa de s’impugnatzione de sa riforma de sa sanidade (leghe inoghe sa noa) in una genia de do ut des: colat una si colat s’àtera.
Gabriele Tanda
Leave a comment