Una farta de seguresa grave at interessadu torra su navigadore Chrome. Custa borta sa vulnerabilidade l’at iscobiada Clément Lecigne, unu chircadore de Google.
Su team de seguresa informàtica de Mountain View l’at giai currègida agiornende sa versione 117.0.5938.132 pro Linux, macOs e Windows ma, a dolu mannu, su bug l’aiant prus chi no isfrutadu sos mertzenàrios tzibernèticos de una sotziedade de sorvelliàntzia.
Numenada CVE-2023-5217 dae sos chircadores, sa farta (de tipologia heap buffer overflow) pertocat sa codìfica vìdeo VP8 de sa libreria libvpx e permitit a sos assachiadores de esecutare còdighe arbitràriu e pònnere in esecutzione aplicativos malèsigos.
Maddie Stone, chircadora de su Google Threat Analysis Group, at ispiegadu chi sa farta CVE-2023-5217 beniat impreada pro installare spyware in sos dispositivos de sos obietivos.
Sa vulnerabilidade in chistione est sa de chimbe fartas 0-day de Chrome dae su cumintzu de su 2023.
Gianfranca Orunesu
(Foto de Markus Spiske – Pexels.com)
Leave a comment