Su cunflitu mèdiu-orientale est connoschende in custas oras unu cambiamentu profundu, cun su fogu chi paret iscostiende·si·nche dae sos teatros terrestres traditzionales a sas rotas istratègicas de su mare. Su chi fiat nàschidu comente un’iscontru balìsticu intre s’asse iranianu e su blocu israelu-americanu at agatadu un’epitzentru perigulosu nou in s’istrinòrgiu de Hormuz. In custu passaditzu, vitale pro s’economia globale, sa situatzione est destinada a mudare, de male in peus, in tempos prus chi non lestros. Mescamente dae mèrcuris mangianu, cando una sèrie de ballas de orìgine disconnota at tzentradu unas cantas imbarcatziones tziviles. No est petzi una chistione de dannos a sos navios mercantiles. S’istrategia de Teheran est crara: fàghere de s’istrintòrgiu unu tretu marinu malu a rugrare. In prus de sos atacos diretos, s’Iran est in chirca de positzionare minas subàcueas tàticas, una mossa chi diat fàghere de cussu istrintòrgiu unu tzugru de ampulla pro su cummèrtziu globale. Dae custu bratzu de mare colat belle una parte de chimbe de su petròliu mundiale e una de bator de Gnl. Unu blocu totale, cosa chi mai fiat sutzèdida in antis de como, diat sonare che a un’agangada pro s’economia globale intrea. Duos sunt sos obietivos de sa Repùblica Islàmica: a un’ala, Teheran cheret impònnere a s’amministratzione Trump sa fine de sos bombardamentos, iscudende corfos a s’Otzidente in sa parte sua sa prus crìtica: su prètziu de s’energia; a s’àtera, sos Pasdaran punnant a mantènnere isulados sos paisos àrabos de su Gulfu, cun sos portos e sas infrastruturas petrolìferas issoro chi dipendent de su totu dae sa seguresa de s’istrintòrgiu. Mentras chi sos Istados unidos sunt decrarende de àere giai distruidu maicantas unidades navales de minamentu iranianas, s’arriscu de un’errore de càrculu est artu meda. Si s’Iran deveret resessere a serrare a beru cussu coladòrgiu, sa crisi energètica chi si diat presentare, diat podere èssere meda prus grae de sa de sos annos ’70, corfende che mai a un’Europa giai dèbile e torrende a bortulare sas alleàntzias internatzionales in unu momentu de tensione estrema.
mauro piredda (foto pexels)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment