Comente aìamus contadu inoghe, sa riforma de sa Sanidade votada in martzu de ocannu e chi at cummissariadu sas ASL de s’ìsula, no agradaiat a maicantas fortzas polìticas. A su PD non l’est pràghida sa manera de seberare sos commissàrios de sa Presidente Todde, chi, sena isetare, at numenadu sas ghias noas de sos entes. No est istada atzetada dae sas opositziones, chi ant acusadu su Movimento 5 stelle de punnare a si leare su setore ammanìgiadu dae sa Regione prus ricu e cun prus traballadores.
Como a nàrrere chi sa riforma no andat bene est su Ministèriu de sa Sanidade e su guvernu Meloni, chi at impugnadu sa lege e at arressadu sa nùmena de commissàrios. Sa neghe pro Roma est chi sa riforma tenet sos piessignos de unu spoil sistem, est a nàrrere su càmbiu de sas chimas de s’amministratzione pùblica. Difatis, sa Corte Costitutzionale aiat inditadu chi custa manera podet andare bene petzi pro sas positziones prus arta, ma non pro sos amministradores mèdios e bàscios, ca s’arriscu est de triulare sa màchina de s’Istadu sena dare continuidade a su traballu de sos entes de su territòriu. B’at de nàrrere chi chie est istadu numenadu no at sa chìgia de persones de partidu, e ant otènnidu petzi unu rolu de ses meses. Su chi no agradat a Meloni non sunt tantu sos commissàrios, ma s’idea de una riforma de sa sanidade chi càmbiet su fràigu fatu dae Solinas. Sa cuntierra, tando, no est tècnica, ma polìtica.
Sas maneras sighidas dae Todde, forsis, non sunt istadas sas prus apropriadas e sos tempos chi at impitadu pro sa finantziària, intritzada e allentada dae custa riforma, sunt istados tropu longos. Però si b’at un’autonomia berdadera, sos polìticos sardos podent e depent sighire su mandadu chi lis at intregadu su pòpulu sardu e, tando, proare a cambiare sas cosas. Ma s’Istadu — cussu ondradu dae s’innu d’Itàlia su 28 de abrile — fintzas si sas fortzas polìticas in su Cussìgiu regionale sunt italianas, non cheret de a beru una possibilidade gasi: non cheret nemmancu unu pagu de autoguvernu de sos sardos.
Gabriele Tanda
Leave a comment