Piantedosi, su Ministru de s’Internu italianu, in un’intervista a su «Corriere della Sera» de lunis (inoghe), at naradu chi su clima polìticu chi est creschende in Itàlia s’assimìgiat a cussu de sos annos de prumu e de su terrorismu. Su riferimentu craru est a sas acontèssidas de Torinu in sa manifestatzione pro defensare su tzentru sotziale Askatasuna, in ue unu politziotu est istadu magiadu, paret cun unu marteddu; ma fintzas a sas àteras manifestatziones contra a sas Olimpìades de ierru de Milanu e a sos chi parent sabotàgios a sas lìneas de sos trenos.
Su Ministru, però, non s’abìgiat chi s’istrategia de sa tensione chi at angiadu su mostru de sos annos de prumu est incumintzada cun sas bombas de sa dereta ligada a sos servìtzios segretos “deviados”. Dae sa timoria de sos ambientes prus a curtzu a su fascismu coladu dae pagu de pèrdere su poderiu chi galu aiant e dae sa punna de nde conchistare de prus puru. Ismanniare su caos pro fàghere pedire dae sa populatziones medidas prus tèteras in contu de seguresa: custa fiat sa tàtica.
Oe s’òrdine est diferente: su guvernu est da nessi un’annu chi est proende a fàghere colare su decretu seguresa, chi però est denegadu dae sa Corte Costitutzionale e dae su Presidente de sa Repùblica. Difatis fintzas custa borta sas propostas fiant de dare un’amparu legale tropu mannu a sos agentes de sas fortzas de s’òrdine e a issos ebbia; s’arbìtriu de arrestare pro prus o mancu una die “suspetados”, sena però acusa peruna. S’àtera borta aiant postu finamentas una genia de iscudu legale a sos infiltrados chi ghiant o ammanìgiant asòtzios terrorìsticos (inoghe).
Custa borta su decretu est coladu cun mudàntzias fungudas, ma custu paret chi no apat chietadu s’opinione pùblica chi, dae cantu essit dae sos sondàgios (inoghe), est timende chi su logu de libertade de manifestare e de faeddare potzat minimare.
Sas acontèssidas de custas chidas parent, tando, bènnere in su momentu prus giustu: comente a dare una resone a sas punnas de controllu de su guvernu, chi est fintzas timende chi su referendum, pro atzetare sa riforma de sa giustìtzia, potzat andare male.
Gabriele Tanda
Leave a comment