Giai s’ischit chi in istiu sa Sardigna divenit groga, su calore est tropu e erba meda si sicat. Ma sos giornales de custas dies non sunt arresonende de cussu grogu, ma torra de sos livellos de Covid in s’ìsula: si nche est lompende belle che a su puntu de torrare a sas medidas de custu beranu. Su pro ite no est ligadu a sos nùmeros de sos contagiados, ma de sos malàidos in terapia intensiva: pro su Covid sos letos ocupados in custa genia de repartos sunt serentes a su deghe pro chentu, balore chi faghet iscatare su grogu. Ma no est petzi cussa sa cantidade de importu, ma finas sos letos ocupados – semper pro neghe de su Covid – in repartos normales e, pro fortuna, cussu est galu bàsciu. Tando no est gasi dàbile chi amus a mudare colore deretu, ma sa situatzione est peorende a sa lestra.
Nois tenimus sa situatzione prus grae in s’Istadu, ma sa maladia si nche est ispartzinende in totu su Paisu. Sa Regione aiat pedidu a Draghi de fàghere controllos a sa tzucada e no a sa lòmpida, ma sa rechesta però no est istada gasi forte ca nemos at fatu nudda. Pro firmare custa crèschida su guvernu est pensende de pònnere s’òbligu de su documentu birde pro intrare in cada tzilleri e ostera de Itàlia, no pro bufare o manigare in foras, ma petzi pro istare intro. Sa medida si cheret introduire a lenu a lenu, ca non s’ischit comente compidare de a beru e ca non si cheret produire trìulu. Sa veridade est chi totus e pro totue sunt isetende s’agabbu de s’istajone turìstica, barigare su trinta de austu e posca bìdere ite est capitadu.
(redatzione)
Leave a comment