E semus torrados a bìdere un’àtera crisi de su guvernu italianu. Onniune narat chi tenet resone e chi s’àteru non balet a nudda: paràulas, cuntierras e trìulu e posca totus in paris cando at a cumbènnere. Est difìtzile a nde bogare capu, ma proamus a acrarire carchi aspetu.
Dae s’Europa sunt lompende belle 200 milliardos pro agiudare s’economia de s’Istadu italianu. Cada polìticu est chirchende de bi pònnere paràula in subra, e chie ghiat su guvernu podet seberare a chie los dare e in ite investire. E tando pro ite Renzi, chi fiat in su guvernu, si nche est chèrfidu essire? Non si ischit pro seguru, chie narat pro otènnere prus poderiu in unu guvernu nou, chie pro una cuntierra a subra de una lege a subra de sos servìtzios segretos chi allònghiat sos annos de sas ghias chi bi sunt como.
Àtera chistione de importu est chi in su 2022 s’at a votare pro su Presidente de sa Repùblica e in pagos bi cherent suprire cun unu guvernu nou (mescamente sos chimbe isteddos e sa manca), ca sos echilìbrios como sunt connotos: Conte a sa fine est unu personàgiu chi at guvernadu cun sa dereta e cun sa manca. Cun una majoria noa a ghia noa, non s’ischit comente s’ant a cumportare.
Sas eletziones non s’ant a fàghere, francu pro s’epidemia, su chi non agradat est chi su parlamentu imbeniente at a àere su mesu de sos deputados e senadores pro more de sa lege chi est colada cun su referendum. Tando una majoria noa giai s’at a agatare, bi est de cumprèndere si Conte bi l’at a fàghere a abarrare comente Presidente o si ant a lu cambiare.
Como inghitzat su mercadu in bidea de custu lunis, cando Conte at a torrare in Parlamentu pro proare a mantènnere sa ghia de su guvernu. S’isetu est chi sa punna de totus siat de agiudare un’Istadu chi est in una situatzione mala de a beru e in ue prus o mancu totus semus atoghende.
Est craru, dae nessi una bindighina de annos, chi sas ideologias de su Noighentos sunt interradas. Semus torrados a sos tempos de sos Comunes de su Mesuevu: b’at partziduras de poderiu ebbia, amigàntzias e disamistades chi pertocant sos interessos, e non sas ideas. Non b’at unu disignu de sotziedade, de benidore e prus pagu de mancu de cultura. Como chi est como, podimus petzi annotare custu giogu de sas cadreas e isperare chi chie s’at a sètzere tèngiat unu pagu de cussèntzia.
Gabriele Tanda
Leave a comment
Pro me Conte ha fatu cantu unu politicu naigadu non podiat fagher, ischende chi medas parlamentares e senadores sunt ligados a massonerias o a pendulitzos de pulpu mafisos chi cherent ponner manos a custos milliones chi nos mandat s’Europa. S’unica manera diat esser de sistemare unu guvernu provisoriu e de lu fagher campare fintzas a su G20 e a sas eletziones presidentziales, mandende a Renzi a si rosigare sos poddighes.