Mitza su Cruccui est unu giassu naturalìsticu contivigiadu chi s’agatat in su cumonale de Biddobràna, in provìntzia de Aristanis, e faghet parte de su Parcu Naturale de Monte Arci.
Sa geologia de custu logu est caraterizada dae sa presèntzia de codinas vulcànicas e pedra niedda.
Su giassu s’agatat in unu padente in ue b’at mescamente èlighes, in pare cun matas de aliderru, murta, chessa e lidone.
Sos animales sunt cuddos tìpicos de sa Sardigna, comente su gatu agreste, sa giana de muru, s’assile, su sirbone e, in contu de pugiones, sa tzirulia, s’astore, su tzilìbriu, sa piga, s’ispaderi.
Su giassu est contivigiadu cun pontigheddos in pedra chi colant subra de su riu “Sa roia de su cruccui”. Su riu faghet una sèrie de brincos formende ispèndulas minores, tretos de abba fùrrida e pojos. In prus b’at funtaneddas e mesas pro ispuntinare.
A curtzu b’est su nuraghe Turriu, subra de unu montigru de pedra niedda artu 362 metros e, semper in zona, b’est sa conchedda “Su Secretu de sa Conca e s’ Omini”, in ue contant chi in antigòriu inserraiant sas giòvanas chi aiant afigiadu sende galu bajanas.
