Dae oe sa Fundatzione Barcelona Zoo e su TERMCAT, in collaboratzione cun su Museu de Sièntzias Naturales de Granollers, proponent pro sa cunsulta in lìnia sa publicatzione partziale de su Diccionari dels mamífers del món, (“Ditzionàriu de sos mammìferos de su mundu”, un’òpera chi, cando at a èssere cumpleta, at a cuntènnere belle 6.800 tèrmines currispondentes a sas ispètzias de mammìferos de totu su mundu, classificadas in 27 òrdines e 162 famìlias.
In custa prima editzione b’at 1.432 fògios terminològicos chi pertocant sas ispètzias de mammìferos de 64 famìlias e 16 òrdines, in mesu de sas cales ispicant sos carnìvoros e sos primates. In cada fògiu b’at una denominatzione catalana (o prus de una), sos ecuivalentes in ispagnolu, frantzesu, inglesu e tudescu, e su nùmene sientìficu de s’ispètzia. A bortas ant finas annantu notas cun prus informatziones relativas a su tèrmine (a pitzu de ispètzias estintas o epònimos e topònimos chi formant parte de su nùmene ispetzìficu de sas denominatziones catalanas de unas cantas ispètzias).
In s’òbera b’at finas denominatziones catalanas creadas a nou, chi las ant propostas cunforma a sos critèrios pro sa denominatzione catalana de sos animales (in mesu de sos cales sos pugiones e sas mariposas) elaboradas dae su TERMCAT e aprovadas dae su Cussìgiu Supervisore. Custos critèrios ant permissu de traballare cun coerèntzia e uniformidade in su corpus catalanu de partèntzia, propostu dae su zoòlogu Rafel Cebrian († 2021), cun sa cunsulèntzia de sos espertos de su Zoo de Bartzellona e de su Museu de Sièntzias Naturales de Granollers.
(sa redatzione)
Leave a comment